https://youtu.be/eXwT3n0LMvE
కామాక్షి దేవ్యంబ తవార్ద్రదృష్ట్యా
మూకః స్వయం మూకకవిర్యథాఽసీత్ ।
తథా కురు త్వం పరమేశ జాయే
త్వత్పాదమూలే ప్రణతం దయార్ద్రే ॥
ఉత్తిష్ఠోత్తిష్ఠ వరదే ఉత్తిష్ఠ జగదీశ్వరి ।
ఉత్తిష్ఠ జగదాధారే త్రైలోక్యం మఙ్గలం కురు ॥ ౧॥
శృణోషి కచ్చిద్ ధ్వనిరుత్థితోఽయమ్
మృదఙ్గభేరీపటహానకానామ్ ।
వేదధ్వనిం శిక్షితభూసురాణామ్ ।
శృణోషి భద్రే కురు సుప్రభాతమ్ ॥ ౨॥
శృణోషి భద్రే నను శఙ్ఖ ఘోషమ్
వైతాలికానాం మధురం చ గానమ్ ।
శృణోషి మాతః పికకుక్కుటానామ్
ధ్వనిం ప్రభాతే కురు సుప్రభాతమ్ ॥ ౩॥
మాతర్నిరీక్ష్య వదనం భగవాన్ శశాఙ్కో
లజ్జాన్వితః స్వయమహో నిలయం ప్రవిష్టః ।
ద్రష్టుం త్వదీయ వదనం భగవాన్ దినేశో
హ్యాయాతి దేవి సదనం కురు సుప్రభాతమ్ ॥ ౪॥
పశ్యామ్బ కేచిద్ ధృతపూర్ణకుమ్భాః
కేచిద్ దయార్ద్రే ధృతపుష్పమాలాః ।
కాచిత్ శుభాఙ్గయో ననువాద్యహస్తాః
తిష్ఠన్తి తేషాం కురు సుప్రభాతమ్ ॥ ౫॥
భేరీమృదఙ్గపణవానకవాద్యహస్తాః
స్తోతుం మహేశదయితే స్తుతిపాఠకాస్త్వామ్ ।
తిష్ఠన్తి దేవి సమయం తవ కాఙ్క్షమాణాః
హ్యుత్తిష్ఠ దివ్యశయనాత్ కురు సుప్రభాతమ్ ॥ ౬॥
మాతర్నిరీక్ష వదనం భగవాన్ త్వదీయమ్
నైవోత్థితః శశిధియా శయితస్తవాఙ్కే ।
సంబోధయాశు గిరిజే విమలం ప్రభాతమ్
జాతం మహేశదయితే కురు సుప్రభాతమ్ ॥ ౭॥
అన్తశ్చరన్త్యాస్తవ భూషణానామ్
ఝల్ఝల్ధ్వనిం నూపురకఙ్కణానామ్ ।
శ్రుత్వా ప్రభాతే తవ దర్శనార్థీ
ద్వారి స్థితోఽహం కురు సుప్రభాతమ్ ॥ ౮॥
వాణీ పుస్తకమంబికే గిరిసుతే పద్మాని పద్మాసనా
రంభా త్వంబరడంబరం గిరిసుతా గఙ్గా చ గఙ్గాజలమ్ ।
కాలీ తాలయుగం మృదఙ్గయుగలం బృన్దా చ నన్దా తథా ।
నీలా నిర్మలదర్పణ ధృతవతీ తాసాం ప్రభాతం శుభమ్ ॥ ౯॥
ఉత్థాయ దేవి శయనాద్భగవాన్ పురారిః
స్నాతుం ప్రయాతి గిరిజే సురలోకనద్యామ్ ।
నైకో హి గన్తుమనఘే రమతే దయార్ద్రే
హ్యుత్తిష్ఠ దేవి శయనాత్కురు సుప్రభాతమ్ ॥ ౧౦॥
పశ్యాంబ కేచిత్ఫలపుష్పహస్తాః
కేచిత్పురాణాని పఠన్తి మాతః ।
పఠన్తి వేదాన్బహవస్తవారే
తేషాం జనానాం కురు సుప్రభాతమ్ ॥ ౧౧॥
లావణ్యశేవధిమవేక్ష్య చిరం త్వదీయమ్
కన్దర్పదర్పదలనోఽపి వశం గతస్తే ।
కామారిచుమ్బితకపోలయుగం త్వదీయం
ద్రష్టుం స్థితాః వయమయే కురు సుప్రభాతమ్ ॥ ౧౨॥
గాఙ్గేయతోయమమవాహ్య మునీశ్వరాస్త్వాం
గఙ్గాజలైః స్నపయితుం బహవో ఘటాంశ్చ ।
ధృత్వా శిరఃసు భవతీమభికాఙ్క్షమాణాః
ద్వారి స్థితా హి వరదే కురు సుప్రభాతమ్ ॥ ౧౩॥
మన్దారకున్దకుసుమైరపి జాతిపుష్పైః
మాలాకృతా విరచితాని మనోహరాణి ।
మాల్యాని దివ్యపదయోరపి దాతుమంబ
తిష్ఠన్తి దేవి మునయః కురు సుప్రభాతమ్ ॥ ౧౪॥
కాఞ్చీకలాపపరిరంభనితమ్బబిమ్బమ్
కాశ్మీరచన్దనవిలేపితకణ్ఠదేశమ్ ।
కామేశచుమ్బితకపోలముదారనాసాం
ద్రష్టుం స్థితాః వయమయే కురు సుప్రభాతమ్ ॥ ౧౫॥
మన్దస్మితం విమలచారువిశాలనేత్రమ్
కణ్ఠస్థలం కమలకోమలగర్భగౌరమ్ ।
చక్రాఙ్కితం చ యుగలం పదయోర్మృగాక్షి
ద్రష్టుం స్థితాః వయమయే కురు సుప్రభాతమ్ ॥ ౧౬॥
మన్దస్మితం త్రిపురనాశకరం పురారేః
కామేశ్వరప్రణయకోపహరం స్మితం తే ।
మన్దస్మితం విపులహాసమవేక్షితుం
తే మాతః స్థితాః వయమయే కురు సుప్రభాతమ్ ॥ ౧౭॥
మాతా శిశూనాం పరిరక్షణార్థమ్
న చైవ నిద్రావశమేతి లోకే ।
మాతా త్రయాణాం జగతాం గతిస్త్వమ్
సదా వినిద్రా కురు సుప్రభాతమ్ ॥ ౧౮॥
మాతర్మురారికమలాసనవన్దితాఙ్ఘ్ర్యాః
హృద్యాని దివ్యమధురాణి మనోహరాణి ।
శ్రోతుం తవాంబ వచనాని శుభప్రదాని
ద్వారి స్థితా వయమయే కురు సుప్రభాతమ్ ॥ ౧౯॥
దిగంబరో బ్రహ్మకపాలపాణిః
వికీర్ణకేశః ఫణివేష్టితాఙ్గః ।
తథాఽపి మాతస్తవ దేవిసఙ్గాత్
మహేశ్వరోఽభూత్ కురు సుప్రభాతమ్ ॥ ౨౦॥
అయి తు జనని దత్తస్తన్యపానేన దేవి
ద్రవిడశిశురభూద్వై జ్ఞానసమ్పన్నమూర్తిః ।
ద్రవిడతనయభుక్తక్షీరశేషం భవాని
వితరసి యది మాతః సుప్రభాతం భవేన్మే ॥ ౨౧॥
జనని తవ కుమారః స్తన్యపానప్రభావాత్
శిశురపి తవ భర్తుః కర్ణమూలే భవాని ।
ప్రణవపదవిశేషం బోధయామాస దేవి
యది మయి చ కృపా తే సుప్రభాతం భవేన్మే ॥ ౨౨॥
త్వం విశ్వనాథస్య విశాలనేత్రా
హాలస్యనాథస్య ను మీననేత్రా ।
ఏకామ్రనాథస్య ను కామనేత్రా
కామేశజాయే కురు సుప్రభాతమ్ ॥ ౨౩॥
శ్రీచన్ద్రశేఖర గురుర్భగవాన్ శరణ్యే
త్వత్పాదభక్తిభరితః ఫలపుష్పపాణిః ।
ఏకామ్రనాథదయితే తవ దర్శనార్థీ
తిష్ఠత్యయం యతివరో మమ సుప్రభాతమ్ ॥ ౨౪॥
ఏకామ్రనాథదయితే నను కామపీఠే
సమ్పూజితాఽసి వరదే గురుశఙ్కరేణ ।
శ్రీశఙ్కరాదిగురువర్యసమర్చితాఙ్ఘ్రిమ్
ద్రష్టుం స్థితా వయమయే కురు సుప్రభాతమ్ ॥ ౨౫॥
దురితశమనదక్షౌ మృత్యుసన్తాసదక్షౌ
చరణముపగతానాం ముక్తిదౌ జ్ఞానదౌ తౌ ।
అభయవరదహస్తౌ ద్రష్టుమంబ స్థితోఽహం
త్రిపురదలనజాయే సుప్రభాతం మమార్యే ॥ ౨౬॥
మాతస్తదీయచరణం హరిపద్మజాద్యైః
వన్ద్యం రథాఙ్గసరసీరుహశఙ్ఖచిహ్నమ్ ।
ద్రష్టుం చ యోగిజనమానసరాజహంసం
ద్వారి స్థితోస్మి వరదే కురు సుప్రభాతమ్ ॥ ౨౭॥
పశ్యన్తు కేచిద్వదనం త్వదీయం
స్తువన్తు కల్యాణగుణాంస్తవాన్యే ।
నమన్తు పాదాబ్జ యుగం త్వదీయాః
ద్వారి స్థితానాం కురు సుప్రభాతమ్ ॥ ౨౮॥
కేచిత్సుమేరోః శిఖరేఽతితుఙ్గే
కేచిన్మణిద్వీపవరే విశాలే ।
పశ్యన్తు కేచిత్త్వమృదాబ్ధిమధ్యే
పశ్యామ్యహం త్వామిహ సుప్రభాతమ్ ॥ ౨౯॥
శంభోర్వామాఙ్కసంస్థాం శశినిభవదనాం నీలపద్మాయతాక్షీం
శ్యామాఙ్గాం చారుహాసాం నిబిడతరకుచాం పక్వబింబాధరోష్ఠీమ్ ।
కామాక్షీం కామదాత్రీం కుటిలకచభరాం భూషణైర్భూషితాఙ్గీం
పశ్యామః సుప్రభాతే ప్రణతజనిమతామద్య నః సుప్రభాతమ్ ॥ ౩౦॥
కామప్రదాకల్పతరుర్విభాసి
నాన్యా గతిర్మే నను చాతకోఽహమ్ ।
వర్షస్యమోఘః కనకాంబుధారాః
కాశ్చిత్తు ధారాః మయి కల్పయాశు ॥ ౩౧॥
త్రిలోచనప్రియాం వన్దే వన్దే త్రిపురసున్దరీమ్ ।
త్రిలోకనాయికాం వన్దే సుప్రభాతం మమాంబికే ॥ ౩౨॥
కృతజ్ఞతా
కామాక్షి దేవ్యంబ తవార్ద్రదృష్ట్యా
కృతం మయేదం ఖలు సుప్రభాతమ్ ।
సద్యః ఫలం మే సుఖమంబ లబ్ధం
తథా చ మే దుఃఖదశా గతా హి ॥ ౩౩॥
ప్రార్థనా
యే వా ప్రభాతే పురతస్తవార్యే
పఠన్తి భక్త్యా నను సుప్రభాతమ్ ।
శృణ్వన్తి యే వా త్వయి బద్ధచిత్తాః
తేషాం ప్రభాతం కురు సుప్రభాతమ్ ॥ ౩౪॥
ఇతి లక్ష్మీకాన్త శర్మా విరచితమ్
శ్రీకామాక్షీసుప్రభాతమ్ సమాప్తమ్ ॥
No comments:
Post a Comment